کراچی: موبائل مارکیٹ میں گارڈ کی فائرنگ سے وی لاگر کے جاں بحق ہونے کی تحقیقات میں سیکیورٹ کمپنی تعاون سے گریز کررہی ہے۔
تفصیلات کے مطابق تفتیشی حکام کا کہنا ہے کہ ٹک ٹاکر کی ہلاکت کے واقعے کی تحقیقات میں سیکیورٹی کمپنی تعاون نہیں کررہی، سیکیورٹی کمپنی سے رابطہ کیا گیا لیکن ان کی جانب سے کوئی جواب نہیں ملا۔
تفتیشی حکام نے بتایا کہ تاحال سیکیورٹی کمپنی سے کسی بھی شخص نے بیان ریکارڈ نہیں کرایا، سیکیورٹی گارڈ احمد گل 4 ماہ قبل سرینا موبائل مارکیٹ میں تعینات کیا گیا تھا۔
خیال رہے کہ سخی حسن سرینا موبائل مارکیٹ کے قریب سوشل میڈیا پلیٹ فارم کے لیے ویڈیو بنانے والے نوجوان کو قتل کردیا گیا تھا۔
سعد احمد نامی نوجوان سرینا موبائل مارکیٹ کے قریب ٹک ٹاک کے لیے ویڈیو ریکارڈ کررہا تھا، اس دوران وہاں موجود سیکیورٹی گارڈ کی جانب سے اسے ایسا کرنے سے روکا گیا۔ تاہم گارڈ نے مشتعل ہوکر فائرنگ کردی جس سے 24سالہ نوجوان سعد احمد ولد مختیار احمد جاں بحق ہوا۔
ایس ایس پی سینٹرل نے بتایا کہ تیموریہ پولیس نے فائرنگ کرنے والے گارڈ کو گرفتارکرلیا، گرفتار35 سالہ گارڈکی شناخت احمد گل ولد زواتا خان کے نام سے ہوئی۔
پولیس کا کہنا تھا کہ گارڈ سیکیورٹی کمپنی کا ملازم ہے جس کے پاس موجود ٹرپل ٹو قبضے میں لےلی گئی ہے۔ گارڈ نے ابتدائی طور پر بتایا کہ نوجوان ٹک ٹاک بناتے ہوئے میری طرف اشارے کررہا تھا۔
ایس ایس پی سینٹرل نے کہا کہ گارڈ نے نوجوان کے ایسا کرنے پر غصے میں آکر فائرنگ کردی، متوفی کی لاش اسپتال منتقل کرکے ضابطے کی کارروائی مکمل کی جا رہی ہے۔
