بالی ووڈ کے معروف اداکار سیف علی خان کے بیٹے ابراہیم علی خان فلم ’دلیر ‘ سے بالی ووڈ میں نام بنانے کے لیے اپنی کمر کس لی ہے، اس فلم سے ہی ایک ساؤتھ اداکارہ بھی ڈیبیو کرنے جا رہی ہے۔
بھارتی میڈیا کے مطابق ایک اور اسٹار کِڈ بالی ووڈ میں قدم رکھنے کے لیے تیار ہے، سیف علی خان اور امرتا سنگھ کے بیٹے ابراہیم علی خان اپنی پہلی فلم ’دلیر ‘ کے ساتھ شوبز میں قدم رکھنے والے ہیں۔
گزشتہ سال ابراہیم علی خان کی فلم کے حوالے سے یہ خبر آئی تھی کہ ابراہیم علی خان کو کوئی اور نہیں بلکہ کرن جوہر لانچ کر رہے ہیں لیکن اب ابراہیم کے بالی ووڈ ڈیبیو کے حوالے سے ایک بڑی اپ ڈیٹ سامنے آئی ہے۔
بھارتی میڈیا کے مطابق ابراہیم علی خان بالی ووڈ میں اپنی ڈیبیو سرزمین سے نہیں بلکہ فلم ’دلیر ‘ سے کریں گے، اس فلم میں ابراہیم بالی ووڈ کی کسی اداکارہ کے ساتھ نہیں بلکہ ساؤتھ فلموں کی خوبصورت اداکارہ سری لیلا کے ساتھ نظر آئیں گے۔
بھارتی میڈیا کے مطابق فلم دلیر کی ہدایت کاری کنال دیشمکھ کریں گے جبکہ مڈوک فلمز اسے پروڈیوس کرنے جا رہی ہے، ساتھ ہی سرزمین کی ریلیز سے قبل ابراہیم نے فلم دلیر پر بھی کام شروع کر دیا ہے۔
بھارتی میڈیا کے مطابق فلم دلیر ایک اسپورٹس کہانی پر منبی ہے، جس میں ابراہیم علی خان میراتھن کھلاڑی کا کردار ادا کریں گے، فلم کی شوٹنگ بھی ہماچل میں کی گئی ہے۔
اداکارہ سری لیلا سے متعلق بھارتی میڈیا کا کہنا ہے کہ ’سری لیلا کو آخری بار ساؤتھ کے سپر اسٹار مہیش بابو کی فلم گنٹور کارم میں دیکھا گیا تھا، ساتھ ہی رشمیکا کے بعد سری لیلا بالی ووڈ میں ڈیبیو کرنے والی دوسری اداکارہ ہوں گی۔
