آزاد کشمیر : دریائے نیلم میں گاڑی گرنے کے حادثے میں لاپتہ 10 افراد کی تلاش کیلئے آپریشن دوسرے روز بھی جاری ہے۔
تفصیلات کے مطابق دریائے نیلم میں گاڑی گرنے کے واقعے میں لاپتہ افراد کی تلاش کے لئے ریسکیوآپریشن دوبارہ شروع کیا گیا۔
ایس پی نیلم خواجہ صدیق نے بتایا کہ آپریشن میں پاک فوج،پولیس ودیگرریسکیوٹیمیں حصہ لےرہی ہیں ، گاڑی میں23 افراد سوار تھے، جن میں سے 10 تاحال لاپتہ ہیں، لاپتہ افرادمیں 3 سیاح بھی شامل ہیں۔
خواجہ صدیق کا کہنا تھا کہ اب تک 6 افراد کی لاشیں نکالی جا چکی ہیں اور 7زخمی زیرعلاج ہیں اور سات افراد کو زخمی حالت میں ریسکیو کرلیا گیا ہے۔
حادثے میں جاں بحق تین سیاحوں کی لاشیں ملتان روانہ کردی گئی ہیں۔
گزشتہ روز آزاد کشمیر کی وادی نیلم میں ٹریفک حادثہ پیش آیا تھا، جس میں مسافر گاڑی بے قابو ہوکر دریائے نیلم میں جاگری تھی۔
گاڑی وادی نیلم کے نواحی علاقے کیل سے تاوبٹ جاتے ہوئے پڑی کریم آباد کے مقام پر حادثے کا شکار ہوئی تھی ، سولہ مسافرگاڑی کے اندر اور پانچ گاڑی کی چھت پر سوار تھے۔
ڈپٹی کمشنرنیلم صدیق خواجہ نے بتایا تھا کہ گاڑی کو حادثہ سڑک کی حفاظتی دیوار سرکنے کے باعث پیش آیا۔
