میکسیکو: کلاڈیا شینبام میکسیکو کی پہلی خاتون صدر منتخب ہو گئیں، شینبام یکم اکتوبر کو اپنے عہدے کا حلف اٹھائیں گی۔
غیر ملکی میڈیا رپورٹس کے مطابق کلاڈیا شینبام میکسیکو کے تاریخی صدارتی انتخابات میں کامیابی حاصل کر کے ملک کی پہلی خاتون صدر منتخب ہو گئی ہیں۔
حالیہ انتخابات کو میکسیکو کے سب سے بڑے انتخابات قرار دیا گیا ہے، الیکٹورل اتھارٹی کے مطابق انتخابات میں کلاڈیا شینبام نے 58.3 تا 60.7 فی صد ووٹوں کے ساتھ صدارت جیت لی ہے، اور یہ میکسیکو کی جمہوری تاریخ میں سب سے زیادہ ووٹوں کا تناسب ہوگا۔
شینبام نے اپوزیشن اتحاد کے شوکائٹل گالویز کو شکست دی ہے، میکسیکو میں ووٹ ڈالنے کے لیے 98 ملین سے زیادہ ووٹرز رجسٹرڈ تھے۔
انتخابات میں اپنی کامیابی پر شینبام نے عوام کا شکریہ ادا کرتے ہوئے کہا ’میں آپ کو ناکام نہیں ہونے دوں گی۔‘ شین بام توانائی کے شعبے سے تعلق رکھنے والی سائنس دان ہیں اور وہ میکسیکو سٹی کی میئر بھی رہ چکی ہیں۔ شین بام یکم اکتوبر کو حلف اٹھا کر میکسیکو کا صدارتی منصب سنبھالیں گی۔
شینبام کو سیکیورٹی، منظم جرائم، توانائی اور امیگریشن سمیت کئی چیلنجز کا سامنا کرنا پڑے گا، اسی طرح امریکا میکسیکو کے دوطرفہ تعلقات کا معاملہ بھی ان کے لیے ایک اہم چیلنج ہوگا۔
