گھریلو تششد کے مقدمے میں عدالت میں پیش ہونے سے قبل ہی جنونی شخص نے اپنی دوست کو گلا دبا کر قتل کردیا۔
امریکی ریاست کیلیفورنیا میں افسوسناک واقعہ پیش آیا ہے جہاں 37 سالہ شخص کو 2023 میں اپنی 24 سالہ سابق گرل فرینڈ کو قتل کرنے کا مجرم قرار دیا گیا ہے، مذکورہ شخص کو کئی ماہ قبل گھریلو تشدد کے مقدمے میں بھی نامزد کیا گیا تھا۔
اورنج کاؤنٹی ڈسٹرکٹ اٹارنی دفتر نے بتایا کہ ایک جیوری نے آرون رومو نامی شخص کو اپنی سابقہ گرل فرینڈ میرل میٹیس کے فرسٹ ڈگری قتل کے سنگین جرم کا مجرم قرار دیا ہے۔
رومو نے 2022 میں بھی میٹیس کو مارنے کی کوشش کی تھی اور اسے باڑ کے اوپر پھینکنے کے بعد جسمانی تشدد کا نشانہ بنایا تھا۔ مذکورہ شخص کو تشدد اور دھوکہ دہی کا بھی مجرم قرار دیا گیا تھا۔
استغاثہ کے مطابق، 17 مارچ 2023 کو رومو نے میٹیس کو فون کیا اور اسے بتایا کہ وہ بار کے باہر جھگڑے میں زخمی ہوگیا ہے۔ میٹیس نے اس شخص سے بچاؤ کے لیے عدالتی حکمنامہ بھی حاصل کرلیا تھا لیکن وہ پھر بھی رومو کو لفٹ دینے آئی کہ اسے گھر چھوڑ سکے۔
تاہم اگلے دن میٹیس کی والدہ نے بتایا کہ وہ گھر واپس نہیں پہنچی، پولیس جب رومو کے اپارٹمنٹ پہنچی تو میٹیوس کو باتھ روم میں مردہ پایا۔ استغاثہ نے کہا کہ 24 سالہ لڑکی کو بری طرح سے مارا پیٹا گیا اور اسے گلا دبا کر قتل کیا گیا تھا۔
حکام نے رومو کو ریور سائیڈ کے علاقے میں اس کی موجودہ گرل فرینڈ کے گھر سے حراست میں لیا۔ اس نے اپنی گرفتاری سے قبل متعدد بار اپنی جان لینے کی ناکام کوشش بھی کی تھی۔
رومو کو اس کی جرم کی پاداش میں 24 جون کو سزا سنائی جائے گی جبکہ اسے باقی زندگی ریاستی جیل میں گزارنا پڑے گی۔
