لاہور(ڈیلی پاکستان آن لائن)پاکستان کرکٹ بورڈ (پی سی بی) نے آئی سی سی ورلڈ ٹیسٹ چیمپئن شپ کے 7 ہوم ٹیسٹ میچوں کیلئے کوکابورا کرکٹ گیندوں کے استعمال کا فیصلہ کرلیا۔
بورڈ کی جانب سے جاری کردہ اعلامیے میں کہا گیا ہے کہ بنگلادیش کے خلاف 2 ٹیسٹ، انگلینڈ کے خلاف 3 ٹیسٹ اور ویسٹ انڈیز کے خلاف 2 ٹیسٹ میچز کی سیریز میں بھی یہی بالرز استعمال کیے جائیں گے۔
نجی ٹی وی چینل ایکسپریس نیوز کے مطابق آئی سی سی ورلڈ ٹیسٹ چیمپیئن شپ پلیئنگ کنڈیشنز کے مطابق ہوم بورڈ کو یہ اختیار حاصل ہے کہ وہ کرکٹ کی گیندوں کے برانڈ کے بارے میں فیصلہ کرے۔پاکستان کرکٹ بورڈ (پی سی بی) نے 2024-25 کے سیزن میں استعمال ہونے والی کرکٹ گیندوں کے برانڈز کی تفصیل بھی جاری کی ہے جو ایک اسٹریٹجک قدم ہے جس کا مقصد کھیل کے معیار کو بڑھانا ہے تاکہ وہ ہوم پلیئنگ کنڈیشنز کی مخصوص ضروریات کے مطابق ہوسکے۔
دوسری جانب ڈومیسٹک کرکٹ سیزن اگلے ماہ شروع ہوگا، بورڈ نے اعلان کیا ہے کہ ڈیوک گیندیں تمام سینئرز ریڈ بال ڈومیسٹک ایونٹس میں استعمال کی جائیں گی۔
پاکستان کرکٹ بورڈ گراس روٹ لیول اور پاتھ وے کرکٹ میں ایسلائن اور گریز برانڈ کی گیندیں استعمال کرے گا جن میں انڈر13 انڈر 17 انڈر19 ٹورنامنٹس اسکولز۔ یونیورسٹیز کلب اور انٹرڈسٹرکٹس مقابلے شامل ہیں۔
یہ فیصلہ ڈومیسٹک وینیوز پر گراؤنڈ اور پچ کنڈیشنز کے مکمل تجزیے کے بعد کیا گیا ہے جس میں ڈیوک گیند کو مقامی پچوں کی خصوصیات کے مطابق اپنی مرضی کے مطابق بنایا گیا ہے۔ڈومیسٹک 50 اوورز اور ٹی20 مقابلوں کیلئے پی سی بی بین الاقوامی معیار کے ساتھ مستقل مزاجی کو برقرار رکھتے ہوئے کوکا بورا کرکٹ گیندوں کا استعمال کرے گا کیونکہ آئی سی سی ایونٹس سمیت دنیا بھر میں تمام وائٹ بال کرکٹ کوکابورا گیندوں سے کھیلی جاتی ہے۔
پاکستان کرکٹ بورڈ نے یقین ظاہر کیا ہے کہ ٹونی ہیمنگ کی چیف کیوریٹر کے طور پر حالیہ تقرری کے ساتھ 2024-25 کے پورے سیزن میں پچز مختلف کرکٹ گیندوں کے استعمال میں معاونت کیلئے تیار کی جائیں گی۔
ہیمنگ متعلقہ ڈپارٹمنٹس کے ساتھ مل کر ایسی پچز تیار کریں گے، جو نہ صرف کھیل کے معیار کو بڑھاتی ہیں بلکہ بیٹ اور گیند کے درمیان مسابقتی توازن بھی برقرار رکھتی ہیں۔ٹونی ہیمنگ پچز کی تیاریوں کے علاوہ مقامی کیوریٹرز کی تربیت اور کوچنگ کے بھی ذمہ دار ہوں گے جنہیں مختلف ریجنز اور ڈسٹرکٹس میں کھیل کے لیے ایک جیسی پچز تیار کرنے کا کام سونپا جائے گا۔
